Pubblichiamo con gran piacere la filastrocca in cosentino di Pietro Russo, con tema il Coronavirus
U pu’ ncuntra’ ogni juarnu
n’avimu tanti ntuarnu
E’ chiru ca fà u sbruffune
ma sutta sutta è nu fifune
Quannu si presenta nu periculu
finiscia ca diventa nu ridiculu
Mo’ ca du virus s’è sparsa sa paura
ca iddru un si spagna, si giura e si spergiura
Fa ru spiertu e u curaggiusu
dicia a ttia ca si ansiusu
ca a su fattu un c’hai crida
si notizie u fannu rida
Tena atru a chi penzà
va truvannu i scialà
“M’è arrivatu u mezzu nuavu
e dumani forse u pruavu”
Ti lu dicia mmienzu a vìa
mentre tu sta jiennu ara farmacìa
a cumprare nu flacune d’amuchina
o ara Conad nu bidone i candeggina
Si s’accorgia di su fattu, ti fissìa
picchì pensa ca è propriu na ciutìa
Ma s’a cosa pu’ si fà … nu pocu seria
i su tipu vena fora … sulamente na miseria
Si u ncuantri sinni stà luntanu
un ti vulissa dare mancu a manu
pu’ u fà picchì è costrettu
ma si vida … tena fretta
T’addummanna cumu và
ma si vo’ sulu alluntana’
ti saluta priestu priestu
e si scorda puru i chiru ca t’ha chiestu
Quannu i tìa è già distante
chiava i manu aru disinfettante
cu nu gel i chiri c’ha cumpratu
si pulizza a manu ca t’ha datu
Ca ormai s’è scurticata
tantu ca si l’è lavata
ma è cchiù forte d’iddru stessu
si sa sciacqua cussì spessu
Picchì u fattu i l’infezione
è diventata n’ossessione
Fà ra spisa cu dua carrelli
hai vidi cumu i dinghia, a chi livelli !
Escia pocu e tena sempre a mascherina
sinni cangia una a sira e una a matina
Quasi quasi si mintissa puru i guanti
e sa piglia cu tutti i governanti
Quannu parla nu scienziatu o na scienziata
i guarda cura vucca spalancata
Ogni cosa ca loro dicunu a vo’ senta
ma i tutte si notizie unn’è ca s’accuntenta
Senza n’avìre mancu nu vantaggiu
è capace i scrivi certi tipi di messaggiu
mintiannu in giru cose ca un su’ vere
ca creanu l’ allarme un sulu dindra u quartiere
Và truvannu puru chine è statu
su virus in Italia all’avi’ purtatu
ca unn’è curpa di i migranti … l’ha dd’ammette
sa vota un po’ jì cuntannu … i solite pagliette.
